सोन्याची दरवाढ अजून कुठपर्यंत?

Reading Time: 2 minutes

सोन्याची दरवाढ अजून कुठपर्यंत?

शेअर बाजाराबरोबर सोन्याची दरवाढ अनेक गुंतवणूकदार मित्रांना आकर्षित करीत आहे. सोन्याच्या भावात विक्रमी वाढ झाली असली तरीही खरं सांगायचं तर सोन्याकडे गुंतवणूक करणे या हेतूने सोनं विकत घेणारे लोक अत्यंत कमी आहेत. 

सोन्याच्या किमतीवर परिणाम करणारे ५ प्रमुख घटक

  • सोन्यातील गुंतवणूक ही बहुतांश वेळा भावनात्मक असते. अनेकदा त्याचे दागिने केले जातात यात घडणावळ जाते शिवाय ते मोडताना त्यात घट कापली जाते. याशिवाय दागिने सांभाळण्याची जोखीम वेगळीच. 
  • सोन्याचे दागिने विकून अथवा गहाण ठेवून कर्ज मिळवणे हे कमीपणाचे लक्षण समजले जाते. त्यामुळे एकदा दागिन्यांत रूपांतर झालेले सोने फक्त नवीन पद्धतीचा दागिना निर्माण करण्यासाठी वापरले जाते. 
  • सोन्यातील खरीखुरी गुंतवणूक ही शुद्ध स्वरूपातील सोने खरेदी विक्री करून होऊ शकते परंतू सोन्यावर 3% व त्याचे नाणे किंवा बिस्कीट बनवण्याच्या मजुरीवर 5% जीएसटी लावला जातो त्यामुळे त्याच्या हाताळणी खर्चात वाढ होते याशिवाय त्याला सुरक्षित ठेवण्याची जोखिमही वाढते. 
  • हा खर्च कमी करण्यासाठी सुवर्ण सार्वभौम रोखे, इ गोल्ड, गोल्ड ईटी एफ यासारखे पर्याय आहेत याशिवाय अनेकांनी किमान गुंतवणुकीत डिजिटल गोल्ड खरेदी विक्री याचे सुलभ पर्याय उपलब्ध करून दिले आहेत. त्यामुळे गुंतवणूकदारांना आपल्या गरजेनुसार योग्य मार्ग शोधता येणे शक्य आहे.

सोन्याच्या घराघरांतील साठ्यासंबंधी  लवकरच मोठ्या निर्णयाची प्रतीक्षा 

कोविड-19, शेअर बाजार आणि सोन्याची दरवाढ

  • कोविड-19 नंतर जगभरातील अर्थव्यवस्था मंदावली त्यामुळे बहुतेक सर्व देशांनी अर्थव्यवस्थेस उभारी देण्यासाठी ज्या योजना योजल्या त्यातील बरीचशी रक्कम ही थेट मदत या स्वरूपात होती. 
  • त्यामुळेच मोठ्या प्रमाणावर पैसा हा बाजारात आला याचा परिणाम म्हणून कोसळलेला शेअरबाजार सावरून तो लवकरच नवा उच्चांक गाठेल.
  • आजवरील अनुभव असा की जेव्हा शेअरबाजार वाढतो तेव्हा सोन्याचा भाव स्थिर राहतो यावेळी प्रथमच शेअरबाजार आणि सोने उच्चांकी भाव दर्शवित आहेत. 
  • अलीकडे हा भाव किंचित खाली आला तरी भावावाढीच्या तुलनेत तो अत्यल्प आहे. 
  • अर्थव्यवस्था अस्थिर असली की लोकांचा चलनावरील विश्वास कमी होतो व ते गुंतवणुकीचे पर्यायी मार्ग शोधतात. त्यामुळे जगभर असुरक्षिततेच्या भावनेतून सोन्याची सातत्याने खरेदी होत आहे. 
  • यापूर्वीच्या लेखात म्हटल्याप्रमाणे गेल्या 6/7 महिन्यात ज्या गतीने भावात वाढ झाली ती पाहता या दिवाळीत 10 ग्रॅम सोन्याचा भाव  ₹80000  पर्यत जाऊ शकेल असा या क्षेत्रातील तज्ज्ञांचा अंदाज आहे. 
  • आंतरराष्ट्रीय बाजारातही 1औस सोन्याचा भाव 1519 $ वरून 2000 $ वर गेला आहे जो लवकरच 2500$  वर जाईल असा अंदाज आहे. 

Gold ETF and Gold Fund: गोल्ड ईटीएफ आणि गोल्ड फंड  

  • बहुतेक सर्व देशाच्या मध्यवर्ती बँका पर्यायी गुंतवणूक म्हणून सोने खरेदी करीत असतात. 
  • याप्रमाणे आपली रिझर्व बँक ही सोन्याची नियमित खरेदी करीत असते. जुलै 1991 मध्ये आपल्याकडे आर्थिक पेचप्रसंग निर्माण झाला त्यावेळी आयातीसाठी आणि परकीय कर्ज फेडण्यासाठी आपल्याकडे काहीच शिल्लख नव्हती. 
  • जागतिक बँकेने कर्ज देण्यास नकार दिला अशा वेळी आपल्याकडील सोने गहाण ठेवून पैशांची उभारणी करण्यात आली. फेडरल रिझर्व ही अमेरिकेची मध्यवर्ती बँक सोने खरेदी न करता सरकारच्या मालकीच्या सोन्याचे विश्वस्त म्हणून काम पहाते. 
  • बाकी बहुतेक सर्व देशांच्या मध्यवर्ती बँका नियमित स्वरूपात सोने खरेदी करीत असत
  • सोन्याच्या दुर्मिळता, रोकडसुलभता आणि सर्वंमान्यता या गुणांमध्ये आता मोठ्या परताव्याची शक्यता हा गुणधर्म जोडला गेल्याने त्याच्या भावात उत्तरोत्तर वाढ होत राहील. 
  • अमेरिकेत नवीन सरकार स्थापन होऊन त्यांचे जे औद्योगिक धोरण ठरेल तोपर्यंत या भावाला लगाम बसणे अशक्य वाटते. तेव्हा आज जास्त वाटणारा भाव अजून सहा महिने वर्षभरात खूप कमी होता असे होण्याची शक्यता जास्त आहे. 
  • आपल्या गुंतवणुकीतील 5% ते 10 % वाटा सोन्यामध्ये असावा असे गुंतवणूक तज्ञांचे मत आहे त्या दृष्टीने ज्यांना शक्य असेल त्यांनी यात आपली गुंतवणूक करायला आणि असलेल्यांनी ती वाढवायला हरकत नाही.

– उदय पिंगळे 

For suggestions queries – Contact us: info@arthasakshar.com 

 Download Arthasakshar App – CLICK HERE

Read – Disclaimer policies

Click to rate this post!
[Total: 2 Average: 5]

Leave a Reply

Your email address will not be published. Required fields are marked *