Bank and Credit Card
आजच्या लेखात आपण बँकेला क्रेडिट कार्ड व्यवसायामुळे नक्की कोणते फायदे होतात, याबद्दल सविस्तर माहिती घेणार आहोत (Bank and Credit Card). क्रेडिट कार्ड घेण्यासाठी आजकाल प्रत्येकालाच सतत फोन येत असतात. तुम्ही कोणत्याही बँकेत गेल्यावर तिथली एखादी व्यक्ती लगेच तुम्हाला क्रेडिट कार्डसाठी विचारणा करते. तुम्ही पेट्रोल पंपावर जरी गेलात तरी काही बँकांनी आपले क्रेडिट कार्ड विक्री प्रतिनिधी तिथे नेमले आहेत. कोणतीही बँक क्रेडिट कार्ड विकण्यासाठी, ती सेवा आपल्याला देण्यासाठी इतकी आग्रही का असते ? तुमच्या एका क्रेडिट कार्डमुळे बँकेचा नेमका काय फायदा होतो ? जाणून घेऊयात.
हे नक्की वाचा: क्रेडिट कार्ड वि. डेबिट कार्ड, कोणत्या कार्डचा उपयोग कधी कराल?
Bank and Credit Card: क्रेडिट कार्ड व्यवसायातून बँकेला होणारे फायदे
१. मार्केटिंग टाय-अप:
- प्रत्येक वस्तू व सेवा पुरवणाऱ्या कंपनीला आजकाल खूप मोठ्या स्पर्धेला सामोरं जावं लागत आहे. नवीन ग्राहकांना आपल्याकडे आकर्षित करून घेण्यासाठी सध्या कित्येक कंपन्या ‘क्रेडिट कार्ड ऑफर’ जाहीर करत असतात.
- क्रेडिट कार्ड वर आलेली ऑफर कंपनीचे मार्केटिंग करते यामुळे विक्रीसाठी याची मदत होत असते. आपल्या ग्राहकांना द्यावी लागणारी सूट कंपनी ‘क्रेडिट कार्ड कॅशबॅक ऑफर’च्या स्वरूपात देत असते.
- ‘नो कॉस्ट ईएमआय’ हा एक नवीन प्रकार सुरू करण्यात आला आहे. ज्यामध्ये तुम्ही खरेदी केलेल्या वस्तूची रक्कम ही ३,६,९ किंवा १२ महिन्यात विभागली जाते.
- पूर्ण रकमेचं विभाजन करण्यासाठी तुमची बँक ‘कन्वर्जन फि’ घेत असते. या रकमेतून बँकांना फायदा होत असतो आणि ऑफर देणाऱ्या कंपनीला एकाच वेळी बँकेच्या सर्व ग्राहकांपर्यंत पोहोचण्याची संधी कमी खर्चात मिळत असते.
२. सर्वाधिक व्याजदर:
- कर्ज घेण्याच्या सर्व पद्धतींपेक्षा क्रेडिट कार्ड मध्ये ४२% इतका वार्षिक व्याजदर ग्राहकांना आकारला जातो. जो प्रतिमहिना ३.५% इतका असतो, जो सामान्य ग्राहक सहज मान्य करतो. एका सर्वेक्षणानुसार, ५०% क्रेडिट कार्डचे पूर्ण बिल हे वेळेवर भरले जात नाहीत.
- क्रेडिट कार्ड ग्राहक हा ‘कमीत कमी रक्कम’ भरून आपलं क्रेडिट कार्ड सुरू ठेवत असतो. बँक ही पूर्ण उर्वरीत रकमेवर २१% व्याजदर लावत असते.
- ‘ग्राहकांना पैसे भरण्याची वाढीव मुदत मिळते आणि बँकांना वाढीव व्याजदर’, अशा पद्धतीने हा व्यवहार सुरळीत सुरू असतो.
महत्वाचा लेख: क्रेडिट कार्ड घेताना माहित करून घ्या या ६ महत्वाच्या गोष्टी
३. ‘कॅश ऍडव्हान्स चार्जेस’:
- ग्राहकांच्या अत्यावश्यक गरजांना डोळ्यासमोर ठेवून क्रेडीट कार्ड देणारी बँक क्रेडिट कार्ड मर्यादा रकमेच्या ४०% इतकी रक्कम ‘कॅश ॲडव्हान्स’ म्हणून वापरण्यासाठी मुभा देत असते.
- झटपट कर्ज म्हणून ग्राहक हा पर्याय वापरत असतात. या व्यवहारावर बँक २.५% व्याजदर आकारात असते. त्यासोबतच, बँक तुम्ही क्रेडिट कार्ड मधून काढलेल्या रकमेवर वार्षिक ४२% इतका व्याजदर आकारत असते.
- सर्वात सहज उपलब्ध होणारी ही कर्जाची पद्धत बँकेला सर्वात जास्त फायदा करून देणारा पर्याय असतो.
४. वार्षिक शुल्क:
- क्रेडिट कार्ड देणारी बँक त्यांच्या ग्राहकांकडून पुढील वर्षी सेवा सुरू ठेवण्यासाठी वार्षिक शुल्क आकारत असते.
- ज्या ग्राहकांनी क्रेडिट कार्ड वापरून कमी खर्च केला आहे त्यांनाही वार्षिक शुल्क आकारले जाऊ शकते. ही रक्कम बँकांसाठी मोठा फायदा करून देणारी असते.
विशेष लेख: मागणी न करताच क्रेडिट कार्ड आले तर काय कराल?
५. सेवा शुल्क (Service Charges):
क्रेडिट कार्ड देणारी बँक ही नियमित शुल्कासोबतच खालील रक्कम आपल्या ग्राहकांकडून वसूल करत असते:
अ) उशिरा भरलेल्या शुल्कावरील व्याज
ब) मर्यादेपेक्षा अधिक खर्च केल्यावर भरावे लागणारं २.५% इतकं व्याज
क) पेमेंट रिटर्न चार्जेस : कोणत्याही कारणास्तव, तुमचा एखादा व्यवहार चुकला ज्यामुळे बँकेला तुमच्या खात्यात पैसे पुन्हा वळते करावे लागले, तर त्या व्यवहारावर सुद्धा बँक व्याज लावत असते.
ड) रिवॉर्ड रिडेम्शन: क्रेडिट कार्डवर केलेल्या प्रत्येक व्यवहारावर काही रिवॉर्ड पॉईंट्स ग्राहकांना मिळत असतात. या रिवॉर्ड पॉईंट्सच्या मोबदल्यात ग्राहकांना भेटवस्तू मिळत असतात. ही सेवा देतांना प्रत्येक बँक ही ग्राहकांना ठराविक रक्कम शुल्क म्हणून आकारत असते.
तुम्ही जर बँकेकडून मिळालेल्या मुदतीत पूर्ण रक्कम भरू शकत असाल, तरच क्रेडिट कार्ड हा योग्य पर्याय आहे. मुदतीनंतर कर्ज परत करणे म्हणजे कर्जच्या जाळ्यात अडकत जाणं हे स्पष्ट आहे. आपली गरज पडताळून, क्रेडिट शिस्त लावून क्रेडिट कार्ड वापरण्यात काहीच गैर नाहीये. क्रेडिट कार्डमुळे बँकांचा होणारा फायदा लक्षात घेतल्यास आपण आपला क्रेडिट कार्डचा वापर नक्कीच नियंत्रणात आणू शकतो.
For suggestions queries – Contact us: [email protected]
Subscribe our YOUTUBE Channel : CLICK HERE
Download Arthasakshar App – CLICK HERE
Read – Disclaimer policies
