Interest on Home Loan
गृहकर्जाच्या परतफेडीसाठी जेव्हा आपल्या खात्यातून दर महिन्याला हफ्ते (Interest on Home Loan) जात असतात तेव्हा आपण अशा भ्रमात असतो की आपलं कर्ज कमी होत आहे, परंतु वास्तविकपणे असे होत नसते. मुद्दल रकमेतील अगदी थोडीशी रक्कम कमी होत असते आणि व्याजाचीच परतफेड चालू असते.
उदाहरणार्थ, आपण ७% व्याज दराने २५ वर्षे कालावधीसाठी २० लाख रुपयांचे कर्ज घेतले असेल तर आपल्याला दरमहा १४,१३६ रुपये हफ्ता भरावा लागतो. आपल्याला असे वाटत असते की यातील ७००० रुपये मुद्दल रकमेत जात असतील आणि उरलेले ७००० व्याजाच्या परतफेडीत परंतु असे होत नाही. पहिल्या महिन्यात त्या १४,१३६ रुपयातील केवळ २,४६९ रुपये मुद्दल रकमेत जमा होतात आणि तब्बल ११,६६७ रुपये व्याजात जमा होतात.
हे नक्की वाचा: कर्ज घेताय? मग लक्षात ठेवा या ५ महत्वाच्या गोष्टी
हे ऐकून तर कदाचित आश्चर्याचा धक्का बसेल की आपण घेतलेले कर्ज आहे २० लाख रुपये परंतु परतफेड करताना आपण व्याजासह बँकेला तब्बल ४२,४०,६७५ रुपये परत करत आहोत. म्हणजेच आपण कर्ज घेतले २० लाखाचे परंतु केवळ व्याजाची रक्कम म्हणून २२,४०,६७५ रुपये बँकेला देत आहोत. कर्जापेक्षा व्याजच अधिक. हे असे होऊ नये म्हणून काय करता येईल? जाणून घ्या काही महत्वाच्या टिप्स:
१. गृहकर्ज परताव्याचा कालावधी:
- गृहकर्ज घेताना परताव्याचा कालावधी शक्य तितका कमी ठेवावा. यामुळे आपल्या मासिक हफ्त्यात थोडीशी वाढ होते परंतु एकूण व्याजाच्या रकमेत बराच मोठा फरक पडतो.
- जसे की, वरील उदाहरणात आपण २५ ऐवजी २० वर्षाची मुदत घेतली, तर आपला मासिक हफ्ता १४,१३६ रुपयांवरून १५,५०६ रुपये होईल. फारतर दीड हजार रुपयांचा फरक, परंतु एकूण व्याजाची रक्कम २२,४०,६७५ रुपयांवरून थेट १७,२१,४३५ रुपये इतकी होते. म्हणजे तब्बल ५,१९,२४० रुपयांची बचत.
२. विविध बँकांच्या व्याजदराची तुलना:
- गृहकर्जासाठी बँक निवडताना विविध बँकांच्या व्याजदराची तुलना अवश्य करा. आज घडीला काही बँक्स ७% दराने गृहकर्ज देत आहेत, तर काही ६.९%- ६.८%. आपण म्हणाल एवढ्याश्या एका पॉइंटच्या फरकाने काय असा फायदा होणार? परंतु आपण एकूण व्याज रकमेची तुलना कराल तर नक्कीच फायदा लक्षात येईल.
- जसे की, आपण वर चर्चा केलेल्या कर्जाचा दर ७ टक्के होता. तेच जर आपल्याला ६.९% दराने मिळाले असते तर एकूण व्याजाची रक्कम म्हणून आपण जेव्हा १७,२१,४३५ रुपये भरत आहोत तिथेच आपण १६,९२,६७७ रुपये भरू. म्हणजेच अगदी शुल्लक अशा एका पॉइंटच्या फरकाने तब्बल २८,७८५ रुपये एवढी बचत. हे केवळ उदाहरण म्हणून पॉइंटच्या फरकाने सांगितले. पूर्ण एक टक्का फरक पडला तर काय होईल याचा आपणच अंदाज लावायला हवा.
विशेष लेख: Home Loan: लवकरात लवकर गृहकर्जातून मुक्त व्हायचे आहे? मग हे वाचा
३. बँकेच्या कर्ज दरात सातत्याने बदल:
- बँकेच्या कर्ज दरात सातत्याने बदल होत असतात. जर आपण अगोदरच कर्ज घेतले असेल आणि आताच्या घडीला आपल्या बँकेच्या गृहकर्जाचा दर कमी झाला असेल तर आपण आपला दर कमी करून देण्याची बँकेला विनंती करू शकता. त्यासाठी प्रत्येक बँकेचे नियम आणि शुल्क वेगवेगळे असू शकते.
- जर आपली बँक आपला व्याजदर कमी करून देण्यास तयार नसेल तर त्या दरापेक्षा कमी दर असणाऱ्या बँकेकडे आपली कागदपत्रे सुपूर्द करा.
- जेव्हा ती नवी बँक आपल्याला कर्ज मंजुरीचे पत्र देईल तेव्हा आपण ते पत्र आपल्या सध्याच्या बँकेत नेऊन देऊ शकता आणि ‘कर्ज हस्तांतरणासाठी अर्ज करू शकता.
- या बँकेचे राहिलेले कर्ज नवी बँक भरून टाकते आणि आपण त्या नव्या बँकेचे कर्जदार बनतो.
संबंधित लेख: गृहकर्ज हस्तांतरण करण्यापूर्वी विचारात घ्या या ५ महत्वाच्या गोष्टी
५. प्री-पेमेंटचे शुल्क:
- ही सर्व प्रोसेस निःशुल्क नसते. जर आपण घेतलेले कर्ज ‘फ्लोटिंग रेट’नुसार असेल तर प्री-पेमेंटचे शुल्क भरावे लागत नाही. परंतु जर ‘फिक्स्ड रेट’नुसार असेल तर आपणास ०.५०% ते ०.७५% दरम्यान शुल्क आकारणी करू शकतो.
या सर्व बाबींचा विचार करून आपण बँक, तिचा व्याजदर आणि परतफेडीची कालमर्यादा ठरवून आपल्या गृहकर्जासाठीच्या व्याजात बचत करू शकता. या व्यतिरिक्त आपण लवकरात लवकर गृहकर्ज फेडण्यासाठी काय काय करू शकता हे समजून घेण्यासाठी ‘अर्थसाक्षर’चाच ‘गृहकर्जाची लवकरात लवकर परतफेड करण्यासाठी ७ महत्वाच्या टिप्स…’ हा लेख वाचू शकता.
For suggestions queries – Contact us: [email protected]
Subscribe our YOUTUBE Channel : CLICK HERE
Download Arthasakshar App – CLICK HERE
Read – Disclaimer policies
web search: Interest on Home Loan Marathi, Interest vs Principal amount vs Interest on Home Loan Marathi Mahiti
