आरोग्य विमा नूतनीकरण करताना तपासा या ९ गोष्टी

Reading Time: 3 minutes

आरोग्य विमा हा स्वतःसाठी व  कुटुंबासाठी खूप महत्त्वाचा असतो. यामुळे आरोग्य खर्चामुळे होणारे वित्तीय त्रास कमी होण्यास मदत होते. आरोग्य विमा मात्र हा काही विशिष्ट काळासाठीच असतो. कालावधी संपल्यावर त्याचं नूतनीकरण करणं आवश्यक असतं.आरोग्य विम्याचे नूतनीकरण करणे अगदी सोपं आहे. परंतु, नूतनीकरण करताना काही गोष्टींची खात्री करून घेणे आवश्यक असते.

आरोग्य विमाच्या कालबाह्यतेपुर्ती नूतनीकरण करणे:-

  • आरोग्य विमा हा काही कालावधीपुरताच असल्याने त्याचे नूतनीकरण करत राहावे लागते.
  • विमा कंपनी तारीख संपल्यावरही ‘ग्रेस पिरिएड’ उपलब्ध करत असते. पण एक महत्त्वाची गोष्ट यात असते की ग्रेस पिरिएड मध्ये विमा कंपनी कुठलेही कव्हरेज वा संरक्षण देत नाही. त्यामुळे आठवणीने आपल्या आरोग्य विम्याचे नूतनीकरण करावे.

आरोग्य विमा नूतनीकरण प्रक्रिया :-

  • आरोग्य विम्याचे नूतनीकरण हे ऑनलाइन करता येते. त्यासाठी विमा कंपनीच्या वेबसाईटवर जाऊन आवश्यक माहिती भरून फॉर्म सबमिट करावा लागतो.
  • तसेच, विमा नूतनीकरण हे ऑफलाइन म्हणजे प्रत्यक्ष विमा कंपनीच्या जवळच्या शाखेत जाऊनही करता येते.
  • नूतनीकरण करताना काही गोष्टींचा विचार करणे आवश्यक आहे. आपली पॉलिसी आपल्यासाठी योग्य आहे का? या गोष्टीचा विचार करून मगच नूतनीकरण करावे. नूतनीकरण करताना काही गोष्टी तपासून पाहिल्यास पुढे जाऊन पश्चात्तापाची वेळ येत नाही.

आरोग्य विमा नूतनीकरण करताना खालील महत्वाच्या गोष्टींची खातरजमा करून घ्या.

१. योग्य आरोग्य विम्याची निवड :

पॉलिसी नूतनीकरण काळात दुसऱ्या कंपनीची पॉलिसी घेता येणं शक्य असतं. वर्तमान स्वास्थ्य विमा योजनेमुळे ग्राहक संतुष्ट नसेल, तर बाजारातील इतर विमा कंपन्याचे प्लॅन्स पडताळून बघावेत. योग्य प्रीमियममध्ये जास्त कव्हरेज देणाऱ्या विमा कंपनीची पॉलिसी घ्यायचा विचार करावा. आपली जुनी पॉलिसी नूतनीकरण करण्याचा एक महत्वाचा फायदा म्हणजे संबंधित पॉलिसीवरील नो क्लेम बोनस (NCB)आपल्याला मिळतो.

२. कुटुंबीयांची गरज आणि आरोग्य विमा:-

पॉलिसीच्या नूतनीकरण  काळात एकदा विमा पॉलिसीचं सिंहावलोकन करावे. आपल्या कुटुंबाला असलेली गरज आणि पॉलिसीमधील सुविधा, संरक्षण याचा विचार करावा. या काळात काही गरजेचे नवे ऍड ऑन्स घेता येऊ शकतात. आपल्या आवश्यकतेनुसार ते घ्यावेत.

३. प्रमाणिक राहा (Declaration):-

ग्राहकाने कायम स्वास्थ्य विमा घेताना कंपनीशी प्रामाणिक असावे. स्वतःला असलेले व्याधी किंवा नूतनीकरण काळात नव्याने झालेल्या काही व्याधींची माहिती (Declaration) विमा कंपनीला आठवणीने द्यावी. यामुळे ग्राहकाला योग्य ते संरक्षण मिळू शकते. व्याधींची माहिती लपवल्यामुळे पुढे प्रचंड मनस्ताप होण्याची शक्यता असते. तसेच तुमचा क्लेम नामंजूर होऊन पॉलिसी रद्द केली जाते.

४. काळजीपूर्वक आणि जागरूकतेने नूतनीकरण करावे:-  

पॉलिसी धारकाने पॉलिसी नूतनीकरण करताना सगळे बदल जागरूक राहून तपासून घ्यावेत. नूतनीकरण झाल्याचे पुरावे, नोंदी, ऍड ऑन्स संपूर्ण तपासून घ्यावे. तसेच पॉलिसीमध्ये नमूद केलेल्या सर्व नियम व अटी पडताळून घ्याव्यात.

५. क्लेम सेटलमेंट:-

विमा धारकाने केलेला दाव्याचे  सेटलमेंट गुणोत्तर (Settlement Ratio) कसं आहे हे बघणं गरजेचं असतं.  जास्तीत जास्त गुणोत्तर असणारी विमा कंपनी योग्य मानता येईल. याशिवाय क्लेम सेटलमेंटला लागणारा वेळही विचारात घेणं आवश्यक आहे. क्लेम सेटलमेंटला कमीतकमी वेळ लावणारी कंपनी योग्य आहे असे समजावे. पॉलिसी घेताना जरी हे गुणोत्तर तपासलेले असेल तरी रिन्यू करताना पुन्हा तपासणे आवश्यक आहे.

६. हॉस्पिटल टाय-अप्स:-

आपल्या घराजवळील हॉस्पिटल्स, शहरातील हॉस्पिटल्स  किंवा ज्या शहरांत कामानिमित्त वा अन्य कारणांमुळे जास्त जाणं अथवा रहावं होतं तेथील हॉस्पिटल्स शी हेल्थ इन्शुरन्स कंपनीचे टाय अप्स असणे गरजेचं असतं. टाय अप्स  हॉस्पिटलमध्ये कॅशलेस सुविधा मिळत असल्यामुळे विमा ग्राहकाची गैरसोय होत नाही. नूतनीकरण करतानाही या गोष्टी पडताळून पहाव्यात.

७. प्री आणि पोस्ट हॉस्पिटलायजेशन:-  

हॉस्पिटलमध्ये भरती होण्यापूर्वी करायच्या चाचण्या, अँब्युलन्सचा खर्च, भरती केल्यानंतरचा सर्व प्रकारचा वैद्यकीय खर्च हा संपूर्ण खर्च  तसेच विमा कंपनी पॉलिसीमध्ये अंतर्भूत आहे का हे बघणं महत्त्वाचं ठरतं.त्याचबरोबर अनेक विमा कंपन्या ग्राहकाला पोस्ट हॉस्पिटलायजेशन म्हणजेच रुग्णाला डिस्चार्ज मिळाल्यानंतरच्या  वैद्यकीय खर्चाची सुविधाही ठराविक कालावधीपर्यंत (सामान्यतः जास्तीत जास्त २ महिने) देतात. त्यामुळे आपल्या पॉलिसीमध्ये सदर खर्च अंतर्भूत केलेले आहेत का? असल्यास त्याचे स्वरूप काय आहे?याबद्दलचे नियम बदलेल आहेत का? असल्यास काय बदल झाले आहेत? या साऱ्या गोष्टींची खातरजमा करून घ्यावी.

८. फ्री मेडिकल चेक-अप:-

आरोग्य तपासणी हा एक महत्वाचा व आवश्यक मुद्दा आहे. वर्षातून किमान एकदा तरी आरोग्य तपासणी व सर्व टेस्ट्स करणे आवश्यक आहे. आरोग्य विमा विकणाऱ्या जवळपास सर्वच विमा कंपन्या विमा धारकाला फ्री मेडिकल चेक-अपची सुविधा देतात. तरीही पॉलिसी नूतनीकरणाच्या वेळी या गोष्टीची पुन्हा एकदा खात्री करून घ्या. तसेच त्यासंबंधित नियम व अटी पुन्हा एकदा तपासून घ्या. आरोग्य तपासणीमध्ये काही कमी-अधिक आढळले तरी विमा कंपनी धारकाचे प्रीमिअम्स रकम वाढत नाही.

९. प्री-एग्झिस्टिंग डिसीज:-

काही आजार हे रुग्णाला पॉलिसी खरेदी करण्याच्या आधीपासूनच झालेले असतात. त्यासंदर्भात रुग्णाने पॉलिसी खरेदी करतानाच डिक्लेरेशन दिलेले असते. बहुतांश विमा कंपन्या सामान्यतः ४ वर्षानंतर काही प्री-एग्झिस्टिंग डिसीज कव्हर करतात. त्यामुळे चार वर्षानंतर प्री-एग्झिस्टिंग डिसीज कव्हर होत असल्याची खात्री संबंधित विमा कंपनीकडून करून घ्यावी.

आरोग्य विमा खरेदी करण्याची 8 महत्वाची कारणेआरोग्यम् धनसंपदा.. आरोग्य तपासणीकडे दुर्लक्ष नको! ,

आरोग्य आणि स्वास्थ्याच्या माध्यमांतून कर वजावटी देणारी कलमं

आपले मत किंवा माहितीचे इतर मुद्दे आम्हाला info@arthasakshar.com वर जरूर कळवा. अर्थसाक्षरचे नवनवीन लेख एका क्लिकवर मिळण्यासाठी 8208807919 हा नंबर ‘अर्थसाक्षर’ या नावाने सेव्ह करून  ह्या नंबरवर ‘Hi’ असा व्हॉट्सॅप मेसेज करा.)

Disclaimer:  आमच्या डिस्केलमर पॉलिसीजबद्दल जाणून घेण्यासाठी https://arthasakshar.com/disclaimer/  या लिंकवर क्लिक करा. आमचे इतर लेख वाचण्यासाठी क्लिक करा: https://arthasakshar.com/  | आमचे सर्व लेख मिळवण्यासाठी फॉलो करा : फेसबुक ट्विटर | Copyright © https://arthasakshar.com | All rights reserved.

Click to rate this post!
[Total: 0 Average: 0]

Leave a Reply

Your email address will not be published. Required fields are marked *